“Erasmus-ean joatea beste kultura batzuetan murgiltzeko aukera izan da niretzat, era irekian sozializatzekoa eta nire autosufizientzia eta autonomia lantzekoa. Gainera, neure ekonomiaren arduradun egiteak ikuspegi aldaketa eman dit, zenbait gastu kudeatzeko orduan. Jakina, esperientzia hau ezagutza berri ugariren iturri izan da, Universidad Nacional de la Platak eskura jarri dizkidan baliabide eta didaktiken ikuspuntutik. Ikaskuntza hori inflexio puntua izan da nire etorkizuneko lanbiderako, pedagogo eta hezitzaile gisa. Oso beharrezko ikusten dut Deustuko Unibertsitateak eskaintzen dituen aukera hauek aprobetxatzea eta, jakina, Erasmus programak eskaintzen digun abentura horretan interesa duten guztiak animatu nahi nituzke”.

“Nire Erasmus-a erronka bat izan da, beste kultura batean berriro hasteko aukera bat, gurea ez bezalako kulturan eta sormenez beteko hezkuntza munduan. Beste kultura batzuk zituztenekin bizi ahal izan naiz eta ikasi dut desberdintasunak ez direla oztopo, bereizi eta, aldi berean, batzen gaituzten zerbait baizik. Stenden-en, Erasmus ikasle izateak ez zuen esan nahi parte hartu gabe denbora labur batez egotea; alderantziz, animatu egiten gintuzten ezagutzen ez genuen mundu bakan horretan murgiltzen, aniztasuna aztertuz eta balioetsiz. Are gehiago, kanpora joatea erabakitzen duzunean, ez zara jabetzen Erasmus programan pertsonak ezagutu eta esperientziak bizi ahala, zugan, zure ekintzetan eta ideietan eragina izan dezaketenik.
Erasmus programari esker, beste era batera bizitzen eta pentsatzen ikasi dut, arriskatzen eta inguru ezezagunera egokitzen. Beraz, niretzat, Erasmus programa neure burua nire ingurutik kanpo eta inguru erosotik urrunduta ezagutzeko bidea izan da. Aukera paregabea neure burua hobetzeko, profesional eta pertsona moduan.
Azkenik, azpimarratu nahi dut Erasmus guk geure bizitzan jartzen ditugun oztopoak eta mugak hausteko bide bat dela. Hau da, tresna bikaina da gure helmugak lortu ditzakegula ulertzeko eta aurreiritziak alde batera utzi eta erronka berrietan murgiltzeko".

"Gradua ikasten nengoela, Coventry-ko Unibertsitatean (Erresuma Batua) eman nuen ikasturte bat. Bestelako esperientzia baten bila nenbilen, beste kultura bat ezagutu nahi nuen, ingeles maila hobetu eta Psikologia beste herrialde batean zein ikuspegitatik lantzen zen ikusi. Esan dezadan, bide batez, Deustutik neraman prestakuntza ona zela. Zailtasunik gabe jarraitu ahal izan nuen erritmoa Coventry-n. Gainera, era askotako pertsonak ezagutu nituen, bizimodu, ohitura eta nazionalitate askotakoak, eta bizipen horrek aberastu egin ninduen. Egun batean, unibertsitatea futbol talderako jokalarien bila zebilela jakin nuen. Probak egin eta lehenengo talderako aukeratu ninduten. Han ere adiskide handiak egin nituen."

"Une honetan urte osoko Erasmus mugikortasun programa egiten ari naiz Bulgarian, National Sports Academy (NSA) “Vassil Levski” izenekoan, Sofia hiriburuaren erditik 7,7 km-tara. Norakoen zerrenda eman eta Bulgaria irakurri nuenean, argi izan nuen niretzat izan behar zuela. Oso txikitatik dut gimnasia erritmikorako zaletasun itzela eta herrialde honetan kirol hori ederra baino ederragoa da. Hona etorri beharra nuen, bulgariar irakaskuntza teknikak ikasteko eta kirol horretako entrenatzaile gisa hazteko eta hobetzeko. Esperientzia erabat gomendagarria da eta, nire ustez, Deustuko Unibertsitateko ikasleok oso oinarri ona dugu erronka berri horri aurre egiteko."